Act 15 | MHL | STEP | Aria wi Kristen mua papako Yuudia kame-pa ikemik nain Antiok owowa ekapemik. Nan owowa nain wi Kristen teeria opora wia maakemi feenap maemik, “Yeesus teeria-pa wiar ikowa nain Moses sira wuak nain pun wiar ookap mia kanima puukowen-na eliw.”

Acts 15

Fiirimowa maneka Yerusalem-pa wuamik

1 Aria wi Kristen mua papako Yuudia kame-pa ikemik nain Antiok owowa ekapemik. Nan owowa nain wi Kristen teeria opora wia maakemi feenap maemik, “Yeesus teeria-pa wiar ikowa nain Moses sira wuak nain pun wiar ookap mia kanima puukowen-na eliw.” 2 Naap maiwkin Pol Banabas ikos wi teeria nain opora wiar iirariwkin opora wiam fienamik. Naapeya wi Antiok Kristen teeria-ke mua papako wia pepekimemik, Pol Banabas wiamiya Yerusalem ikiwuk naep. Neeke opora nain wi aposel ne wi woos mua wiamiya kakenuk naemik. 3 Naap maep wia sesekiwkin ikiwemik. Ikiwemi Fonisia ne Samaria kame Kristen teeria wiar fuunep wi owow oko teeria kema kirep Yeesus opora wiar opamik nain wia maakemik. Naap wia maakiwkin kemelamik.

4 Aria wi ikiwep Yerusalem-pa fuuniwkin wi Kristen teeria, wi aposel ne wi woos mua-ke sira eliwa-pa wia aawemik. Wiam erup nain-ke Mua Maneka kekanowa wieya uuwamik nain wia nanaromamik. 5 Wia maakiwkin wi mua papako iiriw wi Farisi teeria-pa ikok Kristen aremik nain-ke iikirami maemik, “Eliw maeman, nain wi owow oko teeria mia kanima puukowa sira yiar ookuk, ne Moses sira wuomakek nain pun ookam-ikauk.” 6 Naap maiwkin wi aposel ne wi Kristen woos mua wiam fiirimep opora nain aakunemik. 7 Wi opora aakunem-ikok Pita-ke iikirami wia maakek, “Yo-ko efa miimeka. Ni amisareman, iiriw Mua Maneka-ke mua-ko wi owow oko teeria Yeesus opor eliwa wia maakeya opuk naep, uuwowa nain i teeria maneka fain yo efa pepekimok. 8 Mua Maneka i unowiya kema yiar amisarek nain-ke wi owow oko teeria wia aawok nain ilenowa naep Ewar Eliwa wia sesekomak. Iiriw i yia sesekomak naap. 9 Ne unow onaiya epaskun yia wuak. Moram wis pun Yeesus opora opiwkin pina wia iiraromami kema wia kakenak. 10 Nain ni moram aakisa Mua Maneka sira wiar nomakemi Moses sira wuomakek nain wia maakiwkin ookuk naep oniman? Moses sira wuomakek nain i nembesir ne is pun ookowa nain pina maneka furewamik. Naeya wi sira nain ookowa eliw marew. 11 I feenap maimik. I Yeesus opora wiar ookamkun yia kemalep yia aawok. Ne wis pun wia aawok.” Pita-ke naap wia maakek.

12 Aria wi unowiya ifana wuam-ikaiwkin Pol ne Banabas iiriw Mua Maneka-ke wia kekanoweya wi owow oko wiar ikiwep uuwamik nain wia maakemik. Wia maakemi wi Mua Maneka kekanowa-pa maa miililina onam-ikemik nain pun wia maakemik.

13 Ne wiam erup opora wia maakep weeseriwkin Yems-ke iikirap feenap maek, “Aria ni opora-ko efar miimeka. 14 Iir oko-pa Mua Maneka wi owow oko teeria wia kemalep wia aawep ona teeria-pa wia wuak, nain Pita-ke maeya nan miimaman. 15 Ne iiriw profet opora siisimep-puamik nain pun maek, feenap,

16 ‘Mua Maneka-ke feenap maek, “Maa unowa imenareya yo nainiw ekapinen, ne owow saria Dewit owow unowa wia urufam-ikua nain ne uuwow sira wiar orop ikua nain, kiiriw nainiw iikirowinen. Ne kekanowinen.
17 Naap onamkun mua papako nan ikemik nain yo efar ekapuk, ne owow oko teeria iiriw wia maep-puam nain pun yo efar ekapikuan,” Mua Maneka-ke naap maek. Opora nain iiriwiw ona maek nain ariman wuak.’
(Amos 9.11-12)

19 Naapeya yo kema-ke feenap maiyem, wi owow oko teeria kema kirep Mua Maneka ookimik nain is-ke Moses sira ookuk naep me wia maakikua, naeya wi wueliwa ikauk. 20 I feenap oniyen, parosifa wia sesekomami wia maakemkun sira feenap ookuk: wi maa enowa inasina patirimik nain me wiar enimuk. Uruw mia ne sosor mia baliwep kaikuk. Ne maa eneka imakuna firirimiwkin umiya nain me wiar enimuk. Ne maa eneka aka pun me enimuk. Naap wia maakiyen. 21 Moram sira maem nain Moses sira wuomakek nain wi iiriw amisarep ikemik. Owow unowa anane Sabat fofa-pa wiam fiirimep nain unufiwkin miimimik.”

Wi owow oko parosifa wia sesekomamik

22 Ne aria wi aposel ne wi woos mua ne wi Kristen teeria unow onaiya opora anumap wiena teeria-pa mua papako wia pepekimemik. Naeya wis-ke ikoka Pol Banabas ikos wiokap Antiok owowa ikiwikuan. Mua oko unuma Yuudas naemi Basabas naimik, ne oko Sailas, wi wiam erup woos mua-ke. 23 Aria parosifa wiam erup wapena-pa wiar wuamik nain feenap siisimemik,

“I aposel ne Kristen woos mua-ke parosifa fain nia sesekomimik, ni owow oko yomar eliwa Antiok, Siria ne Silisia owowa nan ikeman nain. Iiriw i teeria mua papako wieniw ikiwep opora nia maakemi kema nia pinarowiwkin kema unu-unowa ikeman. Ne opora nia maakemik nain me is-ke wia maakemik, weetak. Ne wi sira onamik nain wiar miimap i unowiya yiam fiirimep aakunep mua papako wia sesekamkun Pol Banabas ikos wiamiya opora fain nia pikiwomuk naemik. 26 Wi wiam erup eena yiena Maneka Yeesus Krais unuma muuta nain uuwami wiam ekeram-ikemik. 27 Ne i Yuudas Sailas ikos wia sesekamkun wiam erup nain wiamiya ikiwep parosifa siisimemik fain niemi wiena opaimika-pa opora nainiw nia maakikuan. 28 Ne Ewar Eliwa-ke kema yieya i sira-sira oko me niiyen, oko kema nia pinarowiyen. 29 I sira fain muutiw niimik, ni maa enowa inasina patirimik nain me wiar enimeka, ne maa eneka aka me enimeka. Maa eneka imakuna firirimiwkin umiya nain me enimeka. Ne uruw mia kaikeka. Ni opor unowa fain ookowen-na baliwep ikowen. I opora muut naap.”
30 Aria parosifa siisimep wiemi wia sesekiwkin Antiok ikiwemik. Ikiwep neeke fuunep wi Kristen teeria wia fiirimep parosifa nain wiemik. 31 Parosifa nain wiiwkin aawep urufap kemelamik, moram opora nain-ke kema wia kekanowak. 32 Ne Yuudas Sailas ikos wis pun profet-ke, wi opor eliwa unowa wia maakemi kema wia iikirowamik. 33 Ne Antiok owowa-pa nan epa eeya ikemik. Ne wi Kristen teeria-ke ni kema eliwiw ikiweka, naap wia maakemi wia sesekiwkin kirep Yerusalem ikiwemik. Kererep wi woos mua wiar ikiwemik. [ 34 Ne Sailas-ke Antiok-pa feek ikainen naek.] 35 Aria Pol Banabas ikos owowa nan mua papako wiamiya mauwami yiena Maneka Yeesus Krais opora nain emeria mua unowa wia maakem-ikemik.

Pol Banabas ikos uuwowa wiam fookamik

36 Aria naap ikok Pol-ke Banabas maakek, “Aria i owow-owowa iiriw eena Yeesus opor eliwa wia maakemik nain-ko wia karuep wia urufiyen, wi aakisa kamenap-ko ikaimik-yon.” 37 Naap maeya Banabas-ke Yon Mak aawu naep maek. 38 Takira nain iiriw mauwowa wiokak nain me welawap Pamfilia-pa ikok wia piipuap kirep owowa ekapok. Naapeya Pol owawiya ikiwowa miatinek. 39 Ne aria wi opora wiam fienap wiam fookamik. Wiisow arep Banabas Yon Mak aawep ikos Saiprus mot wiar oromik. 40 Ne Pol Sailas aawok. Wi ikiwu naep oniwkin wi Kristen teeria-ke wia maakemik, “Mua Maneka ni nia urufam-ikaeya mauweka,” wia naakemik. Ne wi ikiwemik. 41 Ikiwemi Siria ne Silisia kame nain wi Kristen teeria opora wia maakemi kema wia iikirowam-ikemik.